धादिङ अस्पतालले न्यूनतम सेवा मापदण्डमा ८२ प्रतिशत अंक प्राप्त गरेको छ । १ सय शैया बेड पछि पहिलो पटक गरिएको न्यूनतम सेवा मापदण्डको विज्ञ समूहले सेवा, प्रशासन र अतिरिक्त सेवाको बारेमा गरेको अनुगमनबाट ८२ प्रतिशत अंक प्राप्त गरेको हो ।

न्यूनतम सेवा मापदण्डको प्रकृतिको आधारमा बागमति प्रदेश सरकारको स्वास्थ्य मन्त्रालयले सुशासन तथा व्यवस्थापन, क्लिनिकल सेवा, र सहयोगी सेवाको विभिन्न सूचकहरुलाई आधार मानेर मूल्याङ्कन गर्दा ८२ अंक पप्त भएको मूल्याङ्कन टोलीका डा. नवीन दर्नालले जानकारी दिनुभयो ।

विज्ञ समूहले गुणस्तरीय सेवाका लागि लाग्न आग्रह गर्दै सुझाव पेटिका पहुँचमा राख्नुपर्ने, हेमो डायलासिस सेवाको लागि बिग्रेको मेसिन बनाउन मन्त्रालयसंग समन्वय गर्नु पर्ने, विपद व्यवस्थापनका लागि थप आवस्यक सामाग्री व्यवस्थापन गर्नुपर्ने, सरसफाइमा ध्यान दिनुपर्ने, लगायतका सुझाव विज्ञ टोलीले दिएको छ ।

न्यूनतम सेवा मापदण्ड कायान्वयन सम्बन्धी सार्वजनिक कार्यक्रममा विशेषज्ञ सेवा, ल्याब सेवा, एमरजेन्सी सेवा, सुत्केरी सेवा लगायतका सेवाहरुको प्रभावकारिता धेरै रहेको र सेवाग्राहीले समेत खुलेर प्रशंसा गरेको जानकारी दिँदै भवन नयाँ निर्माण गरेर सेवालाई प्रभावकारी बनाउन समेत सुझाव दिइएको थियो।

धादिङ अस्पतालमा आयोजित एक कार्यक्रममा जिल्ला समन्वय समिति प्रमुख नवराज अधिकारी, नीलकण्ठ नगरपालिका प्रमुख भिम ढुंगाना, प्रमुख जिल्ला अधिकारी सुमन घिमिरेलगायतले धादिङ अस्पतालको सेवा र गुणस्तरको प्रशंसा गर्दै निरन्तर कायम राख्न आग्रह गर्नुभएको छ ।